轉載: 俠客行 北河燒臘飯店 (1)

我曾有兩年時間在深水埗渡過, 看到今期 "飲食男女" , 心中有不少感觸，不禁抄了出來。 若出生在北河街板間房裡，命耶 ? 運耶 ?



這是深水埗北河燒臘飯店一個很普通的兩餸飯，由一個平凡大叔烹煮。
炆蓮藕烚青菜番茄煮蛋隨意選，再送白飯一大碗。
質素不能和大飯店相比，最重要是，價錢平，吃得飽。
新移民失業漢，被生活逼得快要發癲，這裏就是喘息的地方。
獨居老人單親家庭，連一頓飯都張羅不來，這裏就是吃飽的源頭。
人活着，不是單靠食物。但吃飽，就有力氣，就有尊嚴。
就能奮起，再和明天的現實，決一死戰。

江湖路冷　飯菜有情
深水埗北河街，是個無情的江湖。

一堆無業漢，遊離浪盪。滿街少數族裔，在等工開。
年老的婆婆，拉着一疊紙皮去賣錢。

新移民婦人，在街市裏搜索廉宜的生活用品。
到午飯時分，他們都放下一切，往一個地方擠，一間名曰北河燒臘飯店的食肆，二十多年的老店，殘殘破破，招牌都蒙上灰塵。但門外店內，卻熱哄擠擁。

「喂！一個咕嚕肉加菜心……一個炆牛腩西蘭花啦！喂喂喂！多少少飯啦唔該！」

門外的外賣檔，賣便宜兩餸飯，廿多盤剛做好的餸菜，蒸䱽魚咕嚕肉炆牛腩番茄蛋紅燒茄子蒸排骨……
熱辣辣，香噴噴。兩個餸，任選一肉一菜，外賣才十三蚊。

堂食也不貴，二十一元三餸一湯，分量驚人，兩個人也夠飽。亦可選炒粉飯麵，全部即叫即做，同樣是二十多元一大碟，很抵食。

「深水埗就喺咁，窮人最多！啲阿伯婆仔，一日得幾十蚊使，唔做啲平價嘢點得啊？」
門前一個穿汗衣的高個子阿叔說。

仗義每多屠狗輩

他叫陳灼明，人人叫他高佬明，五十九歲，是店子老闆兼廚師，十多年前，頂了前老闆的生意，做廉價飯餸至今，飯菜甚少加價，店子也幾乎沒翻新過。

「唔裝修得 o架！一裝修啲客唔敢入嚟 o架！殘殘舊舊，啲客人至食得安心。」他說。
他說的客人，大部分衣衫襤褸，頭髮蓬鬆，好些更是拿着一串膠袋，像極露宿者。

習慣也奇異，有些誓要一個人坐，有人卻偏要搭枱擠在人群中。
有人一進來就高談闊論，找人談國家大事，以及自己的威水史。
有人卻不作一聲，四處迴避他人眼神。

「喺咁 o架啦！有啲失業咗幾十年，有啲老人家又冇人理，呢度成日有道友呀，羊癎症嗰啲人嚟食，亂咁大叫又有，食食吓暈低又有，好平常啫，都係人一個，都要食飯嘅！」

為了讓人們有飯吃，他一年開足三百六十二日，只年初一至三關門。
餸菜也不求其，有魚有肉有菜，有蒸有炒有炸，務求營養均衡一點。
材料都有考究過，泰國米、韓國糖、荷蘭麵粉，絕少用大陸劣貨。

「辛苦搵嚟自在食，日日食曳嘢，人都頹啲啦！要平得嚟又要好先得 o架！」

為了收得平又做得好，他扭盡六壬。
人家一早去菜欄買靚貨，他專登留到十一點才到。
「頭輪攞完，剩番嗰啲菜販會減價，係冇頭輪咁靚仔，但係唔差得幾遠咋，最緊要平好多吖嘛！」
一有時間，又會去人家的貨倉，找些接近過期的減價罐頭，慳一大筆價錢。
天天用的豉油，是去元朗曬場找最底層的頭抽。

「呢層豉油有渣，冇人要，最便宜，其實返去隔一隔渣，同頭抽一樣，豉油味仲濃啲㖭。」
甩了頭的蝦、斷了腳的蟹，他買回來炮製。
用茄汁煮一煮，用咖喱炒一炒，頓時起死回生。

「冇錢賺 o架呢啲，不過食客每次見到，對眼都會放光，梗係！十幾廿蚊有海鮮食喎！去邊度搵？」

他左算右算，千方百計就是為了盡量減輕成本，讓定價維持在一定的低水平。

「唔加得價 o架！個個計到盡 o架嘛！加一兩蚊好大件事呀！
出面？一兩蚊跌咗都費事執啦！」
為了節流，就是店內電器壞了，也自己維修。
通渠等粗活，亦是他一手包辦。用來啤水的水喉，他把它拗成向上屈曲，好讓水流得慢一點，節省水費。工人盡量請少點，自己盡量做多些，一天下來，十六七個小時走不了，捱到金睛火眼。

「係辛苦 o架，不過見到人哋食得開心，我自己都開心 o架！

好陰功 o架！呢度撞口撞面都係窮人，有啲大人返工，細路仔餐飯冇人理。
有啲成世人未食過蟹，有得食咪開心啲囉！」