占卜百案 - 第二案: 大客聖駕

某客戶的朋友，打算前來問卜。並早下戰書云 : “你同我醒醒定定，如果你做得好的既話，之後有排你嘆”. 哼，X 你XY, 家陣當我是按摩骨妹 ? 抑或當我係夜場男陪酒 ? 洗吾洗同你沖埋涼，攞BB 油幫你推背呢 ?

其實類似對白，已聽過無數次了。什麼師傅你呢個擺個無敵風水陣，讓我渡過難關, 以後一百數十個客會介紹你啦.. 等等。會這樣說的人，十個有十個都沒有下聞。這些 “還神” 式的言語，聽得早已麻木。大佬，你都識話第時，第時你香左，介紹牛頭馬面黎呀 ? 定係我招魂請返你上黎呀 ?

所以呢，當時我既反應，只係淡淡然說: “一分價錢一分貨。只要你俾足銀兩，我自然會交出水準表現。”

到了她該日來相，自言已占卜算命無數次，就算逾千大元的塔羅占卜也曾試過。言下之意，臨陣試招之味極濃。江湖上子謀生日子漸久，也沒有什麼緊張。如常占卜，當日卦象明顯，批斷幾句，應付有餘。鑒其貌色，應該也滿意了。

又過了兩日，介紹人打來，說: “你中獎了，她真的會介紹個猛人前來. ” 邊個甘猛 ? 莫非介紹首富誠哥 ? “吾係呀，佢介紹 ABC 既老闆黎呀 ! ”

嘩, ABC 喎 ! 全港旗下逾數十間分店，市場上的一哥服務商，呢次仲吾掂 ?! 於是由個晚開始，接連幾晚每天發夢也在幫人占卜了。

最後，ABC大老闆終於某日黎到，我如常發揮正常表演，結果又點呢 ? 個次之後尾又係無左影囉 。