轉載 : 安城良紅 @ face

舊年無意中發現這個日式 R & B系女歌手 - Beni, 歌曲不是通俗的步姐類型, R&B 得來不是安室的硬繃繃. 當時本地傳媒亦絕少報導(實情是零報道), 我卻當是找到了一絲J-pop 的清泉. 年中去日本旅行, 無論行街或電視裡亦甚少發現她的足跡. 曾經瘋狂上網聽她的歌及看MV, 終於她出現在 Face的專訪了

多得 J2播放《 Kawaii TV》，多咗香港人識 BENI，但其實呢個日美混血靚女唔只識做主持，唱歌先係佢強項，舊年專輯《 Bitter& Sweet》一出即打入 Oricon Top 5，威過當時同樣玩日式 R&B嘅青山黛瑪，今年 6月嘅最新專輯《 Lovebox》推出首週更登上 Oricon大碟榜冠軍，加埋同日本最潮百貨 OIOI合作， BENI今年成為新一代人氣歌姬絕對冇難度！

要同 80後傾偈，你要識若槻千夏、益若 Tsubasa，佢哋係日本 o靚界涉原系（裏原 boyish+涉谷 girlish）教祖，後者更權威到出埋假睫毛，日本 3個月已賣出 50萬對！聽到頭都大埋？那麼送你一個簡易入門，扭開 J2台， o靚界唔只鍾意睇阿 Jin响 Big Boys Club吹水，仲愛睇日本潮流節目《 Kawaii TV》，集集講日本時裝潮流如森女、強女、涉原女等，主持人就係今日訪問的日美混血兒 BENI，出道 8年，十足 Sherman剪咗頭髮先行運。

「其實我出道咗 8年喇， 16歲時參加國民美少女不過冇獎，可能當時唔興我呢啲 mix啦。'08尾開始剪短、染埋髮，唔好以為我係 mix就天生有金髮，其實我啲頭髮好黑 o架！」冇涉谷系 109長頭髮，直認係涉原女，果然夠 o靚，「我一定唔係森女（玩手作仔、愛碎花）啦，完全唔啱我性格，哈哈！我應該係涉原加強女再加 Cool系，即有種 bitter& sweet嘅感覺，咦，同我大碟名撞咗添！」



同香港一樣，一拍電視節目就入晒屋，就算冇步姐、倖田來 未玩 gel甲咁叻，都可成為現時日本超人氣平靚連鎖店 Forever 21代言人（家仲用緊佢首歌）後，再接棒替潮流百貨店 OIOI出別注 tee，但你一定估唔到，原來最想出婚紗，同緋聞男友赤西仁有關？「我得 24歲，冇咁快，近排好多朋友結婚，歌壇又好耐冇一首關於婚禮嘅歌，所以我就出呢首《 Heaven's Door》（ 11月推出）賀吓佢哋！今次設計呢 8款 Rouge de BENI婚紗有正統白色，又有彩色嘅，有長有短，有性感有貼身，而且仲可以上網租！」

未諗住嫁，但已學識做好煮飯婆，「我識整咖喱、生薑豬肉、餃子，仲有沖繩菜（媽媽係沖繩人），全部自己學 o架，因為我怕嫁唔出嘛！哈哈！」鍾意食日本菜嘅可留意 BENI推介，「日本有個網站叫 Cookpad，入面教你整好多唔同類型嘅美食，有晒 steps又有相，好容易學！」身高 162cm但手腳勁 slim嘅 BENI原來好大食，「早餐可食 4個 pancake，再食蛋、煙肉、薯仔，好似 buffet！」訪問中又開始有食癮，試緊意大利菜 Antipasto，飲緊杯 Milky Punch，即刻又同筆者講想食香港嘅雲吞麵！「日本食過，不過我真係想食正宗嘅！」

識飲識食，難怪今次又一城都要搵你嚟做 Taste Cool美食大使啦！結婚想食咩菜，佢竟然話係 yakiniku鐵板燒！「食到人成身油煙味，佢哋一定一世記得我呢餐啦！」BENI又唱得（日傳媒多將佢同宇多田光、青山黛瑪比較）、又煮得、又睇得，又講得（訪問操流利英語），又識設計，香港女歌手想衝出國際歌壇真係難上加難。