術海無涯

聲明: 以下這篇文章, 較適合對術數有認識人士觀看.
(若然你不懂的話, 就睇片算吧啦)

不少人問過在下一個問題: “點解你會去學術數既 ? 乜你吾覺得好八婆咩 ? ” 相信呢句說話, 是每一位術數學者都被問過的問題. 拋開什麼要知悉人生進退之道理, 眾學者踏入玄學目的, 不外是

(1) 想知自已幾時有運行, 怕被睇相佬/運情書呃
(2 ) 想退休後有門手藝用黎搵食
(3 ) 對古代玄學有興趣.
(4) 以上三項混合式.

但是, 很可惜, 學術數入門一直不易. 首先要記熟嘰呢古魯的甲乙丙丁寅卯辰, 又要不怕讀文言文; 好些古籍如不少玄空學者(風水) 都拜為聖經的宅運新案, 更不時出現大量無標點符號的文章. 而術數又分睇相算命風水占卜寫符掌相擇日, 千膠幾樣. 學邊樣先呢 ?

好了, 待得把時間金錢都浸了落去. 又會不時聽到所謂同道人說三道四. 什麼那些是偽訣, 這些是古書故意誤導後人等等. 更甚的, 是聽到話幫人改風水; 是逆天意會遭天遣等等. 跟了一個師傅, 轉下眼第二個師傅又話不需理會某些要訣. 一個不好彩, 遇着商業味重又擅於包裝的師傅, 雙手奉上真金白銀; 又不傳真材實料, 真係叫天不應叫地不聞.

上些什麼大型團體搞的玄學班, 如某大學或某大工會搞的課堂. 我親眼見過某大師竟然夠膽全場大話西遊, 說下清末民初紅樓夢, 講下故事搞下gag, 學理都未講過, 就已到下課時間. 時間快得像看talk show, 氣氛輕鬆得像看棟篤笑. 但是學到了什麼呢 ? 答案是 - 什麼都沒有.

學掌相面相還好, 起碼飲野吹水食飯沖涼賭錢, 中環澳門珠海深圳都可以學下睇邊個行運定係衰神. 學算命, 淨係合化問題都搞得灰頭爛額. 再加上眾多神煞/假從/假專, 初學者極容易判錯命; 批人地條命順風順水由自可. 挽下手, 批出窮途末路, 生意破敗仔女齊飛, 講左出黎都吾知點收科. 學風水, 以為真係睇過幾本S 大師既書就識哂; 叻d 既會睇埋其他所謂古文書既雞精版. 跟住按單執藥, 刻收返幾千銀過下癮; 不亦樂乎 ?

記得某次於茶聚, 與師兄師姐不見多時. 三人話題不免涉及玄空飛星, 在下忍不住問: “若果客人要催桃花, 應用何方法 ? ” 答曰 “催九紫星” . 再問: “師姐是否把當運的八白星當作是仙丹靈藥, 逢八必好 ? 若然如此, 若有某客人被人走數; 苦等資金回籠, 又是否照催八白無疑 ? ” . 師姐不料在下有此一問, 差點當場食剩的半口燒賣也噴了出來. 想必然是自藝成下山後, 從未有再吸收或學習新技術矣. 在下再問了先後天八卦宮位的運用, 擇日催吉招財/動土解官非等等; 兩位都是聞所未聞. 其實兩位師兄師姐本身工作職務不低, 亦久無為他人相宅. 是故師兄師姐口中結巴巴的, 不知如何招架我這名頑皮的小師弟. 由此可見; 入門齊修行, 成就在個人. 學了幾顆吉凶飛星, 就可以為人相宅的話; 未免把堪輿學問看得太低了吧.

若然能夠把擇日、宮位、飛星加以運用, 才是風水精彩之處!